تحضير أفخاد دجاج محمرة بالزيتون بنينة بزاف

تخضير أفخاد أو فخيدات الدجاج محمرين بالزيتون بطريقة سهلة شهوة منهم.

الوصفة:

فخيدات دجاج كمية على حسب عدد الأفراد

نرقدهم ليلة كاملة فتشرميلة

بالنسبة لتشرميلة

معلقة خرقوم بلدي

معلقة سكينجبير

معلقة صغيرة ابزار

معلقة صغيرة هريسة

لب نصف حامضة مصيرة

5 فصوص ثوم

شوية قعقلة وبسيبيسة مطحونين

شوية زعفران الحر الى كان متوفر

3 معالق كبار زيت زيتون

قزبور و معدنوس مقطعين مزيان

ربع كاس ماء

طريقة التحضير:

نخلطو هذه المكونات ب ربع كاس الماء ونشرملو بيه دجاج ديالنا وناخدو شوية من شرمولة،نشرملو بيه تشاوش دجاج ونغطيو الكل وندخلوه ثلاجة ليلة كاملة.

ثم ناخدو طنجرة نديرو فيها بصلة مشلضة ونحطو دجاج ونشحرهم شوية عاد نضيفو ماء كافي لي غيطيب لينا دجاج غير أطيب نزولوه من طنجرة ونحطوه ف طاوة وندهنوه بزبدة وندخلوه فران اتحمر

المرقة لي بقات لينا نصفيوها مزيان وناخدو غير مرقة نردوها طيب مع بصلة مشلضة و قشاوش دجاج وزيتون ونخليوها دغمر وتشرب مزيان ملي تبقي ليا 2 دقايق نحطها نضيف ليها رأس معلقة صغيرة ديال مطيشة الحك هادي كتخليها كتختار وتجي بنينة بزاف،و التقديم يبقى حسب الرغبة.

من إعداد um_yassink@